莊友堅:無莊唔好買

撰文:陳景揚 攝影:徐煥傑 美術:美術組

在金融市場搏鬥超過三十年,一手成立中南證券的股壇猛人莊友堅,向來予人善用財技以及超級大莊家的感覺,近年股壇大事如電訊盈科(00008)私有化案、豐德麗(00571)配股案及中策(00235)收購台灣南山人壽事件等,均與莊友堅扯上關係。筆者今次邀得莊友堅進行專訪,從多方面剖析市場對財技專掠水、莊家劏散戶等誤解,又反擊「股壇長毛」David Webb對中南證券的評論。莊友堅更預測,今次大跌市比2008年股災更慘烈!

※財技非掠水
坊間認為,經常利用財技的上市公司就等同「賊股」,莊友堅首先解釋,財技屬於一個集資的financial instrument,作用包括供股、可換股債券、衍生工具及備兌權證等。他指出,坊間經常將財技及掠水混為一談,其實股神畢菲特(Warren Buffett)利用購入優先股(Preferred Shares)去投資美銀,亦是財技的一種,「坊間坊間,坊間都唔知自己講乜,好似PCCW賺錢嘅時候個個話好㗎,蝕錢嘅時候就鬧到X街!」

莊友堅形容,財技與球技屬於同一道理,「踢波走去踢人兩腳然後入波,咁叫球技咩?馬勒當拿用上帝之手入波,你話係球技定出貓?所以我唔認為財技同掠水、供股或者與小股東蝕本有關。」與此同時,他認為公司大股東自己落鑊炒股票亦非財技,而係「搶錢」!不過他補充,這種從公司「掠」錢出來據為己有的行為,是犯法的搶錢行為。「好似你喺銀行做Teller,趁公司唔留意打開櫃桶,拎走一百萬,咁叫財技咩?咁叫犯法,係人都識啦,所以我唔認為財技同掠水有關。」

他認為,技術要從學問中理解,再從現實中實踐,例如甚麼叫做Off-Balance-Sheet Financing(資產負債表外融資),若果沒有讀書,又怎樣知道甚麼叫做「off」、如何「off」、「off」後會否引起contingent liability(或然負債)?正如備兌權證一樣,莊友堅同樣指出,如何做對沖、如何將公司股票演變成Off-Balance-Sheet,然後將公司的資產縮細,從而令到return on assets(ROA)提高,「咁先叫財技!」他批評,早前出手拯救德發(00928),根本就不是財技,「如果你將呢件事同財技混為一談,咁就死喇!坊間要咁樣形容,我都無辦法,我都要借用前政務司司長唐英年回應與婚外情緋聞時果句,『相當有娛樂性』!」

※無莊家唔 WORK
除了財技之外,不少股友一直批評市場背後的莊家殺盡小股民,兼且行事神秘,似是在背後食大茶飯之士,而莊友堅正正被市場形容為「超級大莊家」,對於這個說法,他直言「如果呢個世界無莊家就唔work!」莊友堅解釋,香港到處都是莊家,窩輪發行人發行窩輪,幫窩輪開價,不就是莊家嗎?股票市場同樣有莊家,做莊並無問題!「我話你知,有莊家股,有人開價,先有人發達,美國所有股票都有莊家,無莊家邊有人買股票?」

筆者反問,假如市場無莊家,會出現甚麼情況?「X街囉!無人開價囉!股民損失囉!馬會唔做莊點賭馬?」莊友堅語氣肯定地指出,馬會是一個莊家,澳門每個賭場都是一個莊家,窩輪發行人是一個莊家,「一堆人覺得某隻股票好,想去買,呢個係一個莊;另一堆人睇淡某隻股票,想去沽,係另一個莊,一個莊可以去沽,亦可以去買,一個莊有佢嘅思想。」莊友堅即場舉例指,你想做滙控(00005)莊家,可以去買1億元滙控,跌過1億元便買入,高過1億元便沽出,這就叫做「1億元的滙控莊家」。

他坦言,莊家行為合法,只要符合聯交所股權披露權益即可。不過,他提醒市場有種「陰手」,即串謀關連人士去做一隻股票,這種莊家「係犯法㗎,係出來呃錢㗎!」他指出,整個社會都存在莊家,例如美國聯儲局印銀紙,就是「維持銀紙秩序」;中國人民銀行利用加息減息去調節銀紙,就是「銀紙莊」;香港政府限制市民買樓的按揭成數,這就叫做「維持秩序」,政府正正就是做莊。
※金主無發達
過去曾有評論認為,中南證券接受上市公司的股票抵押,以向對方貸款,一旦對方無力還債,便可「吞」了對方的公司,莊友堅認為那是無稽之談,現時做「金主」無可能發達,原因是某些公司要借錢,很多銀行不願借錢,皆因相關公司假如真的無力還債,銀行要即時將整個貸款write-off(撇帳),那些公司才會找上「金主」貸款。

當然,他亦承認目前有很多公司上門借錢,當中包括內地公司,對於貸款與否,莊友堅強調,一定要問借錢的「目的」,「正如一個賭徒,問你借錢賭多鋪,佢話一定贏,你都唔借啦!對方問我借錢,我一定要知佢借錢做乜,點樣還?點解你有能力還?借得出去一定要收得番。好多人以為我地借錢出去係想食咗人地間公司,實情並非如此。」

他詳細解釋箇中原因,假如中南證券借錢予A公司,然後「食咗」A公司,即代表你借出去的錢收不回來。「舉埋例畀你,有人按咗五成股票畀我,最後我斬佢倉,咁點呀?我將啲股票斬畀『陰手』咪犯法,我當你夠晒膽量斬畀朋友,自己揸三成,啲朋友又點會支持我入局呢?萬一我斬完倉之後,原來對方喺出面又『陰手』三成,即係輪到佢買三成,然後佢去證監告我,咁點呀?就算我真係接收咗間公司,你都死啦,你連公司入面啲垃圾都買埋。」莊友堅笑說,假如現時仍有公司以為靠借錢斬倉「食咗」對方間公司去屈平貨,即係當自己係抵押舖,他盞鬼地比喻,「嗰啲叫咩呢?好似新晉女星,以為剝晒衫即刻可以紅,賺翻兩個錢。我都就嚟60歲喇,距離呢種好遠喇。」

莊友堅補充,「就算我拎到你間公司,都有好多技術上嘅問題要克服,如果你讀過吓書,就知要克服呢啲技術上問題必然係犯法,金管局會告你,會問你點解唔用拍賣形式、點解你啲利息咁貴、你可能誤導等等,你有無見過一單嘢,係因為『金主』斬倉而得到間公司?」他坦言,從香港金融市場發展以來,根本說不出一間「金主」發達的名字!

※笑談 DAVID WEBB
說過財技、莊家及金主後,筆者問到,莊友堅喜歡炒甚麼類型的股票,他即笑說喜歡自己的「中南網絡」。話說「中南網絡」這個名字,是由股壇長毛David Webb在個人網頁提出,莊友堅利用中南證券的網絡公司(見右表)進行「大串謀」,不過莊友堅平淡表示,個人認為「中南網絡」這個名字起得不錯,不過認為股壇長毛的批評是冤枉他們。「中南依家上唔到市喇,畀David Webb唱到我好似賊咁,其實我三年前已經可以話係退休,我喺整個中南入面無任何職位,無做任何一間上市公司嘅董事,呢幾年就好似閒雲野鶴,我又點可以好似David Webb所講咁,控制果六十間上市公司?」

莊友堅認為,外間有很多誤解,中南證券大約在廿二年前成立,當時叫Capital Union,意思就是有資金的朋友,大家聚集一起做生意,當那些朋友將公司做大做強可以上市,自然會找中南證券做承銷商(underwriter),經歷二十年歲月,在各方朋友介紹下,有不下六、七十間公司幫襯中南。

筆者坦言,坊間指這些公司均由莊友堅控制,莊友堅笑說,「點樣控制六、七十間公司呀?癲嘅咩!照David Webb所講,六十間公司之中,如果以資產值計,最細嘅起碼2億元,資產值最大嘅,講緊係150億元,好似中科礦業(00985),資產值都100億元;如果以市值計,由億幾至60億元不等,單係20億元都好多間,我點控制60間上市公司呀?如果你話幫襯過我都叫做『中南網絡』,喺主板上市超過100間!」

莊友堅指出,當初中南證券的目標,是希望可以打造成在90年代叱吒一時的百富勤,已屆半退休的莊友堅又如何評價中南在這二十年的發展?「佢哋(梁伯韜及杜輝廉)係我偶像,我追唔到喇!當初中南為客戶提供財務顧問,但後來發展成聯誼會一樣,似個investment
club,大家互相介紹生意、共同投資,喺咁嘅環境下,中南好難以企業化完成上市;其次,私人公司喺財務安排上比較靈活,我同你熟啲,畀你做足100%孖展頂住你,爆咗煲我同你講,唔收你利息,分十年還,上市之後,股東係唔會畀你咁做。」

多年來他幫助不少朋友,在莊友堅眼中,最深刻又最叻仔就是中科礦業及國際資源(01051)主席趙渡,「中科向大摩借咗6億元美金買咗個銅礦,國際資源喺印尼Martabe買咗個金礦,呢啲Deal同我係無關!但我好高興佢買咗呢兩個礦,咁咪發咗達囉!」說到朋友的成功,莊友堅表示,好多朋友已經超越他,是值得高興的事!

至於同業金利豐(01031)近年在朱太(朱李月華)帶領下搞得有聲有色,莊友堅認為,金利豐是正正式式的經紀行,目前所欠缺的是基金管理,其他就如一間Corporate Finance(企業融資)加經紀行,業務包括借錢、企業融資及上市等。不過,他認為金利豐與中南完全不同,並形容中南是「私房菜」,而金利豐是一間五星級豪華餐廳,不可以直接比較。

跟住羊咩一齊跑
分享過金融市場的內部運作之後,筆者當然不會放過實際入場炒股的秘訣,順道拎「貼士」!不過莊友堅即時大潑冷水,直言「乜都唔好買」,股市情況比起2008年金融海嘯更差,2012年及2013年將會更慘!他隨即解釋,「唔係講個點數低過上一次,因為點數會調整,我所講嘅慘係講你蝕幾多錢,一定慘過上次,好多大陸股票跌剩一半啦!香港嘅二、三線細價股已經絕望,無架喇!依家仲買呀?」

莊友堅繼續道出原因,美國債務與國民生產總值(GDP)的問題,於上一個股災並未解決,而歐洲共同體則出現結構性問題,歐元區17個國家分別借錢,但利息各有不同,他妙語連珠地表示歐洲的情況如同「有聖靈上的結合而無肉體上的交歡,即係兩公婆,你都唔同佢上床,鬼維持到婚姻咩?」他提醒,歐美債務已係「無cut可cut」,無得再印銀紙,就算印亦會太遲。

他形容股市從2008年10月見底後,要用兩、三年時間上升,但現時兩三個月已經出現大幅調整,「小股民,千祈唔好買,打緊風,你會唔會去游水呀?買股票唔同買衫買肉,呢啲大平賣梗有人買,但股票愈跌愈平就愈無人買,同埋當volume(成交量)一縮,成個市就唔郁,依家講緊嘅係跌五成!講緊要margin call!講緊嘅係銀行唔借錢!」

聽謠言 睇成交 讀年報
市況如斯恐怖,筆者請教如何捕捉入市契機,莊友堅再次強調「Volume!」他認為重新入市毋須做第一個,因為屆時將會「睇到聽到」,因為現時的資訊太方便,Bloomberg可以盡覽外匯、全球股市及各地評論等等。莊友堅更認為,炒股應該要有適當的羊群心理,「啲人話炒股唔好做『羊咩』,其實炒股個個都係『羊咩』,人地叫你先識驚嘛!因為羊咩最怕死嘛,一見到有金執就一齊去,不過最緊要走得快!」

炒細價股方面,他提到有三部曲,第一及第二件事就是「聽謠言」及「睇成交」,「一隻細價股,一日買到盡可能買佢turnover的十分一,如果佢突然跌五成,成交量唔夠,你根本沽唔到,沽唔到就死咗㗎喇!」莊友堅表明,聽完謠言看到成交之後,應該要「讀年報」,了解公司到底有多少NAV(每股資產淨值),「如果佢市值有10億元,但你睇年報,佢equity section得1億元,咁即係10倍P/B,仲買咩?」

莊友堅最後提到,其實股票是實質情況加上人性,可以根據理論及個人看法去判斷,「估估吓,大家鬥估,總之人買你又買,但要沽得快過其他人,就一定掂!」

*編者按:文中「X街」為港式俗語。

莊友堅小檔案
◎ 現年58歲
◎ 1991年成立私人投資公司Capital Union及Hennabun Management,再買入大茂證券,改名中南證券
◎ 1987年轉到信孚銀行(Bankers Trust)任職董事、再轉到所羅門兄弟(Salomon Brothers)任職董事總經理
◎ 1985年回流香港,加入渣打銀行機構市場部
◎ 1979年獲得印弟安那大學工商管理碩士畢業,其後加入PNC Financial Corp.
◎ 1977年畢業於美國賓夕凡尼亞大學生物化學系學士

刊於2011年10月7日
第308期《資本創富》

Comments

Popular Posts