全面商業投產,鐵貨起動在即

2017年1月5日
陳景揚   投資者手記

全面商業投產,鐵貨起動在即
●鐵江現貨多項開啟採礦作業,將於今年全面投產及進行商業生產。

2017年首個交易日紅盤高收,暫時未值得投資者歡喜,皆因目前恒指仍處於下降通道運行,除非升穿下降通道頂部並企穩該水平,否則仍然是一浪低於一浪的格局。本週望望四年前考察過的鐵江現貨(01029),最近公司手影頗多,值得細味。

1月4日,星期三。恭喜各位終於捱過2016年,用「捱」去形容一點也不過份,指數先低後高再打回原形,資金圍炒幾個板塊:煤炭、濠賭、石油。指數原地踏步,表面上看似無驚無險,但如果閣下與筆者一樣專炒細價股,真實情況是既驚且險,進退維谷。

第一,以在2016年1月1日之前上市至2016年12月底止計的香港上市公司約1,800家,拉勻計要輸8%;第二,1,800間公司之中,超過1,100間見紅,拉勻要輸超過20%。換句話說,去年只要揀啱僅餘的600隻股份肯乖乖坐貨,的確會贏開巷,之不過又有幾多投資者會all-in中海油(00883)神華(01088)金沙(01928)銀娛(00027)然後坐到尾?基金經理都做唔到,何況是散戶呢。

鐵貨市值縮水九成

到底2017年先低後高,還是先高後低,還是高高低低,經過2016年洗禮的朋友,筆者奉勸一句無謂去估,太早估中又係錯,估中無落注又係錯,估中落咗雞仔注,都唔知當唔當自己中。跟進一下之前推介的股份,去年10月推薦美麗華(00071),曾一度從15.94元炒上18.54元,升幅約16.3%,其後回調至16元邊見強大支持,過去兩週股價未曾低穿過16.1元;而美麗華的認股權證美麗華酒店一八(01437),走勢基本上與美麗華同步,以正股減去13.5元換股價計,於2.8元至3元邊吸納美麗華酒店一八勝算高。

同樣在去年10月底推介的雅各臣(02633),當時筆者已指出集團潛在併購陸續有來,事實上,雅各臣於12月22日公告斥資5.68億元收購「何濟公」品牌,股價亦從推介前1.5元升至本週三的52週高位1.83元,升幅超過兩成。筆者於11月17日推介益華控股(02213),則繼續有潛在收購進行中,此股已從推介前3.18元,升至本週三收市價3.99元,升幅達到25.5%。

本週望望這隻鐵江現貨(01029),早於2012年5月,筆者曾到俄羅斯作實地考察,從當時計起,鐵江現貨股價由0.9元左近一直跌至去年毫二子才見底,市值縮水接近九成。按照目前已發行股數70.93億股計,現時其市值約27.66億元。雖然鐵貨從低位約0.17元反彈至今已累積近逾倍升幅,但從其近日公告看來,股價似是剛剛起動,有機會上試2015年6月約0.63元。

從2016年5月開始,鐵江現貨已不斷更新營運情況,例如是K&S首批鐵礦石項目如期施工及首次付運中國並獲得現金流等等本週三早上,鐵江現貨再一次公告正面狀況報告,強調公司在現金流、投產、新股東及貸款方面均獲得不同程度的理想進展。及至去年12月,鐵貨以每股0.21元向Tiger Capital Fund發行9.38億股新股,相當於擴大後已發行股本13.22%,配售價較公佈前收市價0.38元折讓約44.7%。同一時間,鐵貨向Tiger Capital Fund發行6,000萬股購股權。

現價與基金成本相若

購股權分兩批行使,第一批3,000萬股之行使價為0.3575元,行使有效期五年;第二批3,000萬股則按一年後首個交易日收市價的110%作為行使價,行使有效期同為五年。目前鐵貨之股東結構為Petropavlovsk(22.06億股或31.1%)、俊安(11億股或15.51%)及Tiger Capital Fund(9.38億股或13.22%)。

另一點要注意的是,鐵貨在2015年6月底曾每15股供4股,每股供股價0.315元,三家包銷商分別是美國另類資產管理公司Pine River、Sothic Capital及瑞士另類資產管理平台Jabre Capital。當時三家包銷商最終食了8.35億股、1.67億股及1.11億股,相當於現時已發行股本11.8%、2.35%及1.56%。鐵貨現價相當接近當時三家基金的成本價,加上上述的購股權亦要在0.3元之上,看來跟多家基金共同進退,應該會有些少甜頭呢!
鐵江現貨(01029)股價圖
1月4日收報:0.390港元
已發行股數:70.93億股
市值:27.66億港元
52週高低位:0.435 - 0.110港元

【景揚觀天下】
每到年底,總係有好多人會懷緬過去,講自己做過乜做過乜,但就好少聽見人講話做唔到啲乜,好簡單,因為好多人都無為自己去定一個目標,一年過去,當然唔會記得年初自己講過啲乜。每一年,我都會將自己好想做到嘅嘢,寫喺一塊大白板上面,呢樣嘢同臥薪嘗膽嘅概念類同,目的係要日日夜夜提醒自己,你要做乜。

舊年最多人問我嘅問題,唔係股票冧把,而係問我點樣喺逆境中堅持。你真係想知道答案?我依家可以話你知。
做人,要知個「醜」字點寫。

舊年,我個白板其中一項係寫住「10%」,意思係2016年只要有10%回報就收貨。結果我做唔到,我好嬲,我真係好嬲我自己,我真係覺得自己好廢,但我敢認,唔會好似啲無賴咁搬龍門。一個人識得嬲自己,識得話自己on9、衰咗,代表佢仲有得救,呢個係孔子喺《中庸》講過:好學近乎知,力行近乎仁,知恥近乎勇。

我做唔到,我衰喺邊度,我點樣可以做好啲,係一個知醜嘅人先會諗。如果你唔信,你可以喺屋企搵個位,大大隻字寫住「我要錢」。寫完後你日日打飛機乜都唔諗又唔做,再日日都望吓呢三個字,不出一個月,你只會有兩個結局,第一,你會自宮,因為你知道自己再咁落去,根本搵唔到錢;第二,你會將果三個字撕落嚟丢咗佢,因為你無辦法面對你自己。

知醜,然後想辦法改善同提升,就係我咁多年嚟堅持又堅持嘅動力。

至於另一個堅持嘅法則,就係只信自己。任何未證明過自己能力嘅人嘅說話,同廢話無分別。當你行緊另一條路嘅時候,大部份朋友一係唔出聲,一係喺背後笑你,你以為呢個世界真係有雪中送炭?唔落井下石已經算係對你最大嘅祝福。就算你有一日稍微有丁點成就,呢啲人都唔會為你高興,因為佢哋會覺得你係好彩。既然係咁,點解要去在乎世俗嘅眼光、評價同所謂嘅建議呢?

各位朋友,2017年,抵得住孤獨,耐得住寂寞,學識孤身走我路。

Comments

Popular Posts