借Hamleys發圍 千百度向上突破

●千百度去年斥資1億英鎊收購英國玩具零售商Hamleys,並計畫今年9月引入中國。

恒指首季雖然下跌5.2%,但以整個季度來看卻是先低後高。從首季低位18,278點反彈至近日高位21,511點,反彈幅度為17.7%或3,233點,再大幅波動的機率漸漸減少,後市宜於21,000點水平先行整固,更勝單邊挾上。

重點
●恒指短期內面對頂頭蟹貨區及獲利盤,整固格局明顯
●年初利淡股市之宏觀因素消散,市場對好消息較敏感
●千百度購入Hamleys後,計畫今年9月於南京開旗艦店
●投資者可候100天線3元買入,中線目標上望4元

4月19日,星期二。港股於上週四試穿21,500點不果,本週一曾一度回落至21,002點,但週二卻再次裂口高開並爆上21,459點。細心閱讀港股走勢,這四天之內有三天是先高後低;同一時間,10天線及20天線卻齊齊升穿100天線。對上一次10天線及20天線跌穿100天線,已經要數到2015年7月初港股大時代爆煲後急跌時份。以上述技術因素來判斷,當中包含兩個啟示。

首先,四天之內三度出現先高後低,反映短期大市進入較大阻力位,而阻力可分為兩部份構成,一是頂頭積壓蟹貨,累積時段為2015年8月底、9月底及12月中;二是來自首季有幸於19,000點之下入市的貨底,由於去年無論散戶還是基金通通輸爆廠,今年勢必要追回報,因此獲利盤湧現是合理行為。換言之,恒指短期內面對頂頭蟹貨區及獲利盤的情況下,此區間內糾纏屬於正常情況,上述「證據」只能用於判斷短線走勢。

短線整固中線好轉
中線情況相對較為樂觀,反映短線走勢的10天及20天平均線升穿反映長線走勢的100天平均線,而50天線的走勢亦開始變得平滑,總體技術走勢向好。事實上,較早前不少淨長倉基金的現金水平相對偏高,經過這一波「焗你追貨」之後,要建倉的投資者應已建得七七八八。綜合上述種種情況可以判斷,恒指短線須於21,000點至21,500點區間整固,中線則在氣氛持續好轉下逐級而上。

宏觀因素方面,年初困擾大市的多個主題例如是人民幣貶值、外滙儲備大幅減少、經濟數據欠佳、油價不斷破底、美國聯儲局加息舉棋不定等等,看似已不能再成為淡友發難的武器。值得注意的是,產油大國於多哈凍產會議不歡而散卻不見對油價帶來強烈負面衝擊,反而科威特工人罷工卻成為油價向上的理由。從這些個別事件可見,市場現時對正面消息的敏感程度,遠遠大於負面消息帶來的震撼。

投資氣氛穩定對於個股炒作明顯有利,筆者最近留意到零售股千百度(01028)有異動。此股去年11月以1億英鎊購入英國玩具零售商Hamleys,當中2,000萬鎊以內部資金支付,另8,000萬鎊則向銀行融資,融資期為36個月,附帶在有條件下延長至60個月之權利,利息則為三個月倫敦銀行同業拆息加某一利率之浮動利率。是次收購代價相當於EV/EBITDA約14.1倍,高於同業中位數約11.8倍。

平有平買,貴有貴買,買回來之後怎麼做才重要。千百度本身做女裝鞋,現在買了一家英國玩具零售店,本身是風馬牛不相及,但集團最新一份公告卻披露,千百度計畫在今年9月份會在南京設立第一家旗艦店,同時會與南京新街口(600682.SH)旗下的House of Fraser進行戰略合作,目的就是透過各自在零售業的優點共同發展,降低成本之餘增加協同效益。

兒童主題殺出重圍
目前中國到處都是百貨公司,但差異性不大,加上欠缺主要針對兒童的零售百貨,相信這類兒童主題購物廣場可殺出重圍。另一方面,內地即將放開二孩政策,新生兒童不致於一瞬間爆發,但保守估計每年可帶來約500萬至600萬新生嬰兒,對擁有250年歷史的經典零售商Hamleys而言,從歐洲來到中國落腳,將可迎來第二春,也許這就是要貴買的理由之一。

截至去年底止,千百度收入增長約8%至30.46億元人民幣,純利2.57億元人民幣,以週二收市價3.29元計,歷史市盈率(P/E)約22.2倍。技術上,此股突破3元後暫時企穩於100天線之上,較保守的投資者不妨於該水平吸納,鑑於現時其10天線已升穿20天、50天及250天線,而20天線亦向上突破,短線先以去年高位4元作目標,以現價計潛在升幅約兩成,如能升穿4元並企穩,目標價將可再向上調。
千百度(01028)半年股價圖
4月20日收報:3.29元
已發行股數:20.82億股
市值:68.50億元
52週高低位:4.00 - 2.00元


談股論勢365
免費電視ViuTV啟播之後,最吸引我睇嘅係《跟住矛盾去旅行》。第四集、五集係講自然學校創辦人海星老師及補習天后Amanda Tann,兩位喺教學方面嘅理念真係好唔同。可能我都有開班教投資,所以對於呢個題材好有興趣。節目之中,Amanda赤裸裸地指出:補習就係要畀到啲嘢學生,學生先會覺得值得。意思係,客人比得錢,就一定要拎嘢走。

兩年前,我喺無心插柳情況下開班教投資,當時想法好簡單,希望大家唔好比人呃,能夠好好循正途去研究股票。點樣先叫正途?每個人有唔同定義。對我嚟講,正途就係睇通告、分析基本因素、判斷宏觀經濟如何影響資金流動、判斷咩為之貴咩為之平。炒財技股、去CCASS數花、聽專欄作家講故事、數乜春波浪,其實唔可以話錯,我亦唔會話揾唔到錢,但我都幾肯定講唔會揾到大錢,道理其實好簡單。

簡單舉個例,識炒股票嘅人,最近只需要炒一隻股票必定贏錢,呢隻叫滙控(00005)。我喺4月8日全日高位46蚊買咗兩萬股,滙控係實力大藍籌,好多證券行可以做八成孖展,如果你同個經紀老友,做夠九成孖展都得。我間行就比八成孖展我,換言之成本大約18.5萬元左右,四個交易日後(4月14日)我喺49.2元沽晒,執六皮幾嘢。識計數嘅人大概睇到,我食到滙控呢7%嘅升幅,但我嘅投資回報係34.6%。

炒滙控,唔需要識財技、唔需要去睇滙控嘅CCASS、更加唔需要靠專欄作家去推介,只係需要識炒股票就夠。反過來講,你花幾多時間去研究細價股,而花咗嘅時間同回報成唔成正比?之但係,如果我開班,又無人會想聽我講炒大價股,因為比得錢嘅「客人」,覺得大價股駛乜春你講,我嚟就係要睇景揚比number我,仙股變毫股,毫股變蚊股,隻隻都要931咁勁...

可能你會問,既然我炒滙控,點解我專欄唔寫滙控?呢個就要返翻去經濟學嘅「供求關係」,因為從歷史hit rate話我知,寫大價股無人想睇,大家只會對細價二、三線股着迷,而事實就係咁殘酷。其實我好想做海星老師,但學生卻鍾意比錢Amanda,咁可以點呢?

21 April 2016

End

Comments

茶餐廳老板 said…
哈哈… 散户都是喜歡“刺激地輸錢, 沉悶地贏錢”吾啱佢地㗎!否則賭場生意何處來呀.....
Andriy CHAN said…
同意😊

Popular Posts